پَنچُمی کَهر: دَلوَتانی نادْراهی
9
هُداوندا گۆن موسّایا گوَشت:
”پِرئونئے کرّا برئو و گۆن آییا بگوَش:
’هُداوند، اِبرانیانی هُدا چُشَ گوَشیت:
”منی مهلوکا بِلّ که رئوت و منا پرستشَ کنت.
2 چێا که اگن آیان رئوگا مئیلئے و اَنگت آیان بدارئے،
3 هُداوند دستا شهارَ دنت و کَهچران، تئیی مال و دَلوَتانی سرا سکّێن گرانێن وباے دئورَ دنت، تئیی هر و اَسپ و اُشتر و پَس و گۆکانی سرا.
4 بله هُداوند اِسراییلی و مِسریانی مال و دَلوَتانی نیاما پرک و پێرَ کنت و چه اِسراییلیانی مال و دَلوَتان یکّے هم نمریت.“‘“
5 هُداوندا یکّ وهدے گیشّێنت و گوَشتی:
”باندا اے مُلکا منِ هُداوند اے کارا کنان.“
6 دومی رۆچا هُداوندا اے کار کرت.
مِسریانی سجّهێن مال و دَلوَت مُرتنت، بله چه اِسراییلیانی مال و دَلوَتان یکّے هم نمُرت.
7 پِرئونا په پَکّا کنگا مردم راه دات و سهیگ بوت که چه اِسراییلیانی مال و دَلوَتان یکّے هم نمُرتگ.
بله پِرئونئے دل اَنگت سِنگ اَت و مهلوکی رئوگا نهاِشت.
شَشُمی کَهر: رێش
8 هُداوندا گۆن موسّا و هارونا گوَشت:
”چه کورَهێا* چَنکے چَنکے پُر بزورێت، و موسّا اِشان پِرئونئے دێما آسمانئے نێمگا شانک بدنت.
9 اے پُر دنزَ بنت و سجّهێن مِسرئے مُلکئے سرا مانَ شاننت و سجّهێن مِسرا انسان و جانوَرانی جانا آبلَهێن رێش و سۆم پێدا کننت.“
10 موسّا و هارونا چه کورَهێا پُر زرت و پِرئونئے دێما اۆشتاتنت.
موسّایا پُر آسمانئے نێمگا شانک داتنت و اے پُران انسان و جانوَرانی جانا آبلَهێن رێش و سۆم پێدا کرت.
11 رێشانی سئوَبا جادوگران موسّائے دێما اۆشتات نکرت، چێا که جادوگر و سجّهێن مِسریانی جانا سۆم در آتکگاَت.
12 بله هُداوندا پِرئونئے دل سِنگ کرت و هما پئیما که هُداوندا گۆن موسّایا گوَشتگاَت، پِرئونا آیانی هبر گۆش نداشتنت.
هَپتُمی کَهر: تْرۆنگَل
13 هُداوندا گۆن موسّایا گوَشت:
”سهبا ماهلّه پاد آ، پِرئونئے دێما در آ و بگوَشی:
’هُداوند، اِبرانیانی هُدا چُشَ گوَشیت:
”منی مهلوکا بِلّ که رئوت و منا پرستشَ کنت.
14 چێا که اے رندی من وتی سجّهێن کَهران تئیی جند و تئیی هِزمتکار و تئیی مردمانی سرا دئورَ دئیان که تئو بزانئے که سجّهێن دنیایا منی پئیمێن نێست.
15 چێا که اگن من بلۆٹتێن، دێری وتی دستُن شهار داتگاَت و تئیی و تئیی مردمانی سرا کَهرے دئور داتگاَت و تئو چه جهانا گار و گُمسار بوتگاَتئے.
16 بله ترا پمێشکا زندگا اِشتُن که وتی زۆر و واکا ترا پێش بداران و سجّهێن جهانا منی نامئے جار جنَگ ببیت.
17 بله تئو اَنگت منی مهلوکئے دێم داشتگ و رئوگااِشَ نئیلئے.
18 بچار، باندا همے وهدا من اَنچێن تْرندێن ترۆنگلے گوارێنان که چه اِد و پێش مِسرا هچبر نبوتگ، چه هما وهدا بگر که مِسرئے بُنپد اێر کنگ بوتگ تان رۆچِ مرۆچیگا.
19 نون هُکم دئے که تئیی هما مال و دَلوَت و اے دگه سجّهێن چیزّ که ڈَنّا اَنت، آیان پناهێن جاگهے ببرنت.
هر مردم و دَلوَت که ڈَنّا بوت و پناه کنگ نبوت، اے ترۆنگل آییا لگّنت و آ مِریت.“‘“
20 پِرئونئے آ هِزمتکاران که چه هُداوندئے هبران تُرسِت، هما دمانا وتی گُلام و دَلوَتِش پناه کرتنت.
21 بله همایان که هُداوندئے هبر مان نئیاورتنت، وتی گُلام و دَلوَتِش ڈَنّا اِشتنت.
22 هُداوندا گۆن موسّایا گوَشت:
”وتی دستا آسمانئے نێمگا شهار دئے که سجّهێن مِسرئے مُلکا ترۆنگل بگواریت، انسان و جانوَر و مِسرئے ڈگارانی هر درچک و دارئے سرا.“
23 موسّایا وتی اَسا آسمانئے نێمگا شهار دات و هُداوندا گرَند و ترۆنگل راه دات و زمینا بیر* کپت.
هُداوندا مِسرئے مُلکا ترۆنگل گوارێنت.
24 ترۆنگلا گوَرت و ترۆنگلئے وهدا گِرۆکا په دَمانے هم بَسّ نکرت.
اَنچۆ ترۆنگل بوت که مِسرا پێسرا هچبر نبوتگاَت، چه هما وهدا که مِسر مُلکے جۆڑ بوتگ.
25 سجّهێن مِسرا هرچے که ڈَنّا اَت، ترۆنگلا جت و پرۆشت، انسانا بگر تان جانوَرا.
ڈگارانی سجّهێن کِشار و درچکی هم جت و پرۆشتنت.
26 تهنا گۆشِنئے دَمگا ترۆنگلا نگوَرت، همۆدا که بنی اِسراییل نِشتگاَت.
27 پِرئونا موسّا و هارون لۆٹاێنت و گوَشتنت:
”اے بَری من گناه کرتگ.
هُداوند بَرهَکّ اِنت و من و منی مردم مئیاربار اێن.
28 هُداوندئے کرّا دْوا بکنێت که اے بَلاهێن گرَند و ترۆنگلا مارا کُشت.
من شمارا رئوگا کِلّان.
شمارا چه اِد و گێشتر اِدا نداران.“
29 موسّایا گوَشت:
”من اَنچۆ که چه شهرا درَ کایان، وتی دستان هُداوندئے نێمگا چِستَ کنان.
گرَندَ اۆشتیت و ترۆنگلئے گوارگ بندَ بیت که تئو بزانئے که دنیا هُداوندئیگ اِنت.
30 بله منَ زانان که ترا و تئیی هِزمتکاران اَنگت چه هُداوندێن هُدایا نتُرسێت.“
31 کَتّان* و جئوئے کِشار تباه بوتنت، چێا که جئوا هۆشَگ و کَتّانا پُلّ جتگاَت.
32 بله گندم و گَلّهئے کشار تباه نبوتنت که اِشانی مۆسم رندا کئیت.
33 موسّا چه پِرئونئے کرّا شت و چه شهرا که در آتک، دستی هُداوندئے نێمگا چِست کرتنت.
گْرند و ترۆنگل اۆشتاتنت و هئورا گوارگ بَسّ کرت.
34 وهدے پِرئونا دیست که هئور و ترۆنگل و گْرند اۆشتاتنت، پدا گناهی بِنا کرت.
پِرئون و آییئے هِزمتکاران وتی دل سِنگ کرت.
35 پِرئونئے دل سِنگ بوت.
اِسراییلیای رئوگا نهاِشتنت، هما پئیما که هُداوندا چه موسّائے زُبانا گوَشتگاَت.